Русская Православная Церковь отмечает память святых:
Священномученика Василия, пресвитера Анкирского (362-363).
Мученика Василия Мангазейского (1600).
Преподобного Исаакия Далматского (IV).
Святителя Павла, еп. Нарбоннского (I) (Кельт. и Брит. ).
Мученицы Дросиды Антиохийской, дщери царя Траяна (104-117).
Новомч. схиигуменьи Софии, Киевской (1941) и свящ. Димитрия Иванова (1934).
«Изборской» иконы Божией Матери (1657).
Мчч. Каллиники и Василиссы Римских.
Прмч. Евфимия Константинопольского (1814).
Новосщмч. Василия (Зеленцова), еп. Прилукского (1930).
Храни вас Господь, Матерь Божия и все святые, их же память мы сегодня отмечаем!
Молитвы:
Сщмч. Василия, пресвитера Анкирского. Кондак, глас 8.
Законно течение совершив/ и веру соблюл еси, священномучениче Василие,/ сего ради мучения венцев сподобился еси/ и Церкве столп непоколебим явился еси,/ Сына, Отцу Собезначальна и Духу исповедав,/ Троицу Нераздельную,/ Юже моли избавитися от бед чтущим Тя,/ да зовем ти:/ радуйся, Василие Богомудре.
Мч. Василия Мангазейского. Тропарь, глас 8.
Богатство видев чистыя души твоей, Василие,/ украсти тщашеся праведных враг,/ подусти господина твоего,/ иже покраденнаго ради богатства своего предав тя судий,/ и от того неповинне многий претерпел еси муки,/ непобедим пребыв до смерти./ Тем, яко приемый венец страдания от всех Владыки,/ моли всем от напастей свободным быти,/ чтущим любовию святую память твою.
Мч. Василия Мангазейского. Ин тропарь, глас 8.
Яко пресветлое солнце,/ возсиял еси чудесы своими в Сибирстей стране,/ в Мангазейских пределех,/ новый мучениче, неповинный страдальче, святе Василие!/ За чистоту душевную и телесную пострадал еси от лютаго врага/ распадением и немилосердием господина своего/ и от начальствующаго бо ту градскаго неправеднаго судий,/ и муки неповинно претерпел еси,/ и кровь свою святую пролиял еси,/ желая вечнаго Царствия Небеснаго./ Сего ради Христос Бог венча тя мученическими венцы на Небеси/, и на земли прослави,/ и Своим Божиим промыслом повеле земли самой от недр своих/ гроб, и тело твое, и срачицу, обагренную кровию твоею, израсти нетленно./ И ныне притекающим к тебе с верою и везде призывающим святое имя твое/ полезная вся, и грехов оставление, и телесем здравие подавай,/ чтущим верою святую память твою,/ и моли Христа Бога спастися душам нашим.
Мч. Василия Мангазейского. Ин тропарь, глас 8.
От града Ярославля Божиим смотрением/ в страну Сибирскую пришедшаго/ и за целомудрие от господина своего/ в Мангазеи пострадавшаго,/ блаженнаго Василия почтим,/ егоже Христос Бог мученическим венцем венча на Небеси,/ нетлением и чудесы прослави на земли./ Ты же, честный страдальче,/ предстательством своим страну нашу в мире сохрани/ и молися о спасении душ наших.
Мч. Василия Мангазейского. Кондак, глас 4.
Страдание совершив, святе,/ погребения же честнаго не сподобився,/ в тинное место ввержен/ и попираемь был еси от мимоходящих,/ но Бог прослави мощи твоя чудесным явлением, Василие,/ прославляяйся во святых Своих,/ даяй страдальцем венец нетленный.
Мч. Василия Мангазейского. Ин кондак, глас 4.
Иже новый в мученицех неповинный страдальче,/ святе Василие, преревновал еси Иосифу Прекрасному и Моисею Угрину во искушениих,/ за чистоту душевную и телесную/ муки неповинно претерпел если./ Сих ради прослави тя Бог,/ и святыя твоя мощи, по явлению твоему,/ от Мангазеи к Енисею во обитель Святыя Троицы/ ту сущим настоятелем принесошася/ и подают исцеления с верою приходящим/ и везде призывающим святое имя твое./ Страстотерпче святый,/ моли Христа Бога/ о православном народе нашем/ и о всех воех наших,/ победу и одоление нам на всех/ непросвещенных иноязычных людех даровати, споборствуя/, и от междоусобныя брани спастися всем моли.
Мч. Василия Мангазейского. Ин кондак, глас 4.
Просветися Божественною благодатию, Боголюбче,/ целомудрием и терпением течение свое мученически скончал еси,/ темже и по смерти яви тя светлость жития твоего,/ источаеши бо чудесы,/ с верою приходящим к честному гробу твоему и вопиющим:/ радуйся, святый Василие,/ Мангазейский и всея Сибири чудотворче.
«Изборской» иконы Божией Матери. Тропарь, глас 4.
Яко звезда пресветлая, возсия во граде Изборске/ образ честный Твой, Богородице Дево,/ от негоже иногда из обою очию течаху слезы, яко струя,/ егоже тогда видевше, народи изборстии,/ мужи и жены с чады, с плачем моляхуся к нему,/ мы же, взирающе умильно, сице глаголем:/ о Пресвятая Владычице Богородице,/ не забуди нас, грешных раб Своих,/ молящихся Христу, Богу нашему, спастися нам.
«Изборской» иконы Божией Матери. Кондак, глас 8.
Заступнице христианом усердная/ и Предстательнице граду нашему Изборску непостыдная,/ не презри моления нас, грешных,/ якоже иногда от Твоего честнаго образа/ слезы источила еси из обою очию, молящися прилежно,/ но предвари, яко Блага, на помощь нашу,/ верно к Тебе припадающих,/ услыши наша моления, Богородице,/ избави нас от нахождения поганых, от всякаго зла,/ ускори же на молитву нашу и потщися на умоление,/ заступающи присно, Богородице, чтущих Тя и вопиющих Ти:/ радуйся, Дево, христианом похвале.
